Ýurdumyzyň “Ahal” futbol topary myhmançylykda Täjigistanyň “Regar Tadaz” kluby bilen AFK-nyň ikinji Çempionlar ligasynyň saýlama tapgyrynda bu çempionatyň toparçalaýyn tapgyryna gatnaşmaga mümkinçilik almak üçin aýgytly duşuşyk geçirdi. Duşuşyk “Ahal” futbol toparynyň peýdasyna 2:1 hasabynda tamamlandy.
Duşuşyk ilkinji minutlardan garşylyklaýyn hüjümlere we derwezä dürs ýerine ýetirilen urgulara baý boldy. Hasaby 62-nji minutda “Ahalyň” düzüminden Bagtyýar Gürgenow açdy. Jogap goluny girizmekde garşydaş topar uzak eglenmedi. 64-nji minutda Dawid Atsam uzak aralykdan dürs urgy bilen gol geçirdi. (1:1) “Ahala” ýeňiş getiren goly 82-nji minutda Hakmuhammet Bäşimowyň ussatlyk bilen geçiren pasyna Süleýman Mirzoýew geçirdi.
Şeýlelik bilen, “Ahal” topary AFK-nyň ikinji Çempionlar ligasynyň toparçalaýyn tapgyryna gatnaşmaga ýollanma aldy. Ýaryşyň bije çekilişigi 15-nji awgustda geçiriler.
Bu çempionata “Ahal” futbol topary bilen bilelikde “Arkadag” topary hem ýurdumyza wekilçilik edýär.
Täjigistanyň Tursunzade şäherindäki merkezi “TALKO-Arena” stadionynda geçen duşuşykda “Ahal” futbol toparyna öz öýünde 2:1 ýeňilen Täjigistanyň “Regar Tadaz” kluby AFK-nyň Çagyryş ligasynyň toparçalaýyn tapgyrynda çykyş etmäge mümkinçilik aldy.