Myrat Garryýew adyndaky Türkmenistanyň Döwlet lukmançylyk uniwersitetiniň wekiliýeti 2026-njy ýylyň 6-7-nji maýynda Gomeliň döwlet lukmançylyk uniwersitetine iş sapary bilen bardy. Bu barada Belarus uniwersitetiniň web sahypasynda habar berildi.
Wekiliýetiň düzümine uniwersitetiň okuw bölüminiň başlygy Geldimyrat Jumagulyýew, ylym bölüminiň başlygy Garabek Goşaýew, neýrohirurgiýa we newrologiýa kafedrasynyň müdiri, Türkmenistanyň baş ştatdan daşary neýrohirurgy Sahyt Annanepesow, şeýle hem fakultet terapiýasy kafedrasynyň assistenti Söhbet Gurbanalyýew girdi.
Saparyň dowamynda türkmen wekiliýeti Gomeliň döwlet lukmançylyk uniwersitetiniň ýolbaşçylary — rektor Irina Nazarenko, okuw işleri boýunça prorektor Wiktor Melnik, halkara gatnaşyklar boýunça prorektor Swetlana Anaşkina hem-de birnäçe ýöriteleşdirilen kafedralaryň müdirleri bilen duşuşyklary geçirdi.
Gepleşikleriň netijesinde taraplar talyplaryň we mugallymlaryň alyş-çalşyny öz içine alýan akademiki ykjamlylyk ugrunda hyzmatdaşlyk etmek barada ylalaşyga geldiler.
Türkmen tarapy Gomeliň döwlet lukmançylyk uniwersitetiniň harby kafedrasynyň işine aýratyn gyzyklanma bildirdi. Sebäbi Türkmenistanyň Döwlet lukmançylyk uniwersitetiniň düzüminde hem öz harby fakulteti hereket edýär. Şeýle hem myhmanlar uniwersitetiň simulýasiýa-attestasiýa merkezine baryp, Aşgabatda şuňa meňzeş merkezi döretmek meýilnamasynyň çäklerinde onuň işi bilen tanyşdylar.