Gazagystan Respublikasynyň Premýer-ministriniň orunbasary – Hökümet diwanynyň ýolbaşçysy Galymjan Koýşybaýew bilen Türkmenistanyň Ministrler Kabinetiniň Başlygynyň orunbasary Nökerguly Atagulyýewiň bilelikde başlyklyk etmeginde türkmen-gazak hökümetara ykdysady, ylmy-tehniki we medeni hyzmatdaşlyk boýunça toparynyň nobatdaky mejlisi geçirildi.
Mejlisiň dowamynda taraplar söwda-ykdysady hyzmatdaşlygy, senagat kooperasiýasyny, oba hojalygyny, ulag-logistika ulgamyny, nebitgaz pudagyny, bilim we medeniýet ugurlaryndaky hyzmatdaşlygy ara alyp maslahatlaşdylar.
Gazagystanyň Premýer-ministriniň orunbasary Galymjan Koýşybaýew Gazagystanyň ikitaraplaýyn gatnaşyklaryň ähli ugurlaryny ösdürmäge taýýardygyny belledi. Mejlisiň jemleri boýunça jemleýji teswirnama gol çekildi.
Hökümetara toparyň mejlisiniň çäklerinde döwlet edaralarynyň, ösüş institutlarynyň hem-de iki ýurduň işewür toparlarynyň wekillerini bir ýere jemlän Gazagystan-Türkmen işewürlik forumy hem geçirildi. Çärä Türkmenistandan 40-a golaý, Gazagystandan bolsa 100 kompaniýa gatnaşdy.
Işewürlik forumynyň netijeleri boýunça birnäçe ikitaraplaýyn resminama gol çekildi:
- «QazTrade» Söwda syýasatyny ösdürmek merkeziniň paýdarlar jemgyýeti bilen Türkmenistanyň Senagatçylar we telekeçiler birleşmesiniň arasynda hyzmatdaşlyk hakynda Ähtnama;
- «Silk Way Asia Trade» jogapkärçiligi çäklendirilen şereket bilen «Hazar Logistik» hojalyk jemgyýetiniň, şeýle hem «Silk Way Asia Trade» bilen «Gamma» hususy kärhanasynyň arasynda elektron söwda ulgamynda hyzmatdaşlyk etmek baradaky ylalaşyklar;
- «Ashra Solutions» jogapkärçiligi çäklendirilen şereket bilen «Ojar Aziýa» hususy kärhanasynyň arasynda maýa goýum we gurluşyk pudagynda hyzmatdaşlyk etmek baradaky ylalaşyk.