Türkiýäniň daşary işler ministri Hakan Fidan Türkmenistanda resmi saparda bolar. Saparyň barşynda ikitaraplaýyn gatnaşyklar we sebit hyzmatdaşlygyna degişli meseleler ara alnyp maslahatlaşylar.
Türkiýäniň daşary syýasat edarasynyň ýolbaşçysynyň 10-11-nji oktýabrda Türkmenistanda saparda boljakdygy bellenildi.
– Hormatly ministrimiz Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň çakylygy boýunça 10-11-nji oktýabrda Türkmenistanda resmi saparda bolar. Saparyň barşynda doganlyk ýurt bolan Türkmenistan bilen ikitaraplaýyn gatnaşyklar bilen bir hatarda sebit we halkara gün tertibiniň meseleleri ara alnyp maslahatlaşylar – diýlip, Türkiýäniň daşary syýasat edarasynyň metbugat beýanatynda bellenilip geçilýär.
Häzirki wagtda Türkiýäniň daşary işler ministri Hakan Fidan Ykdysady Hyzmatdaşlyk Guramasynyň ministrler geňeşiniň 27-nji mejlisine gatnaşmak üçin Azerbaýjanda saparda bolýar.