Russiýanyň koronowirus pandemiýasyna garşy işläp taýýarlan «Sputnik V» waksinasyny Türkiýede öndürmek üçin degişli rugsatnama berildi. Şeýlelikde, Türkiýede öndüriljek rus waksinasynyň bir bejergisiniň bahasy 10 dollar möçberinde bolar.
«Sputnik V»-niň önümçiligi arkaly Türkiýäniň hökümeti waksina meselesinde daşary ýurtlara garaşlylygyny azaltmagy meýilleşdirýär.
Mundan ozal Türkiýe bilen Russiýa bu önümçilik üçin deslapky ylalaşyga gelipdiler. Häzir bolsa waksinany öndürmäge doly rugsat berildi. Rus tarapy Türkiýä wekilçilik edýän derman serişdeleri kompaniýasynyň işi bilen doly tanyşdy we degişli rugsatnamany berdi.
Türkiýäniň «Ýeni Şafak» gazetinde berilýän habara görä, waksinanyň iki sanymynyň bahasy 10 dollara barabar bolar. Bu bolsa Hytaýdan her biri 10-11 dollardan satyn alnan «Sinovac» waksinasynyň bahasy bilen deňeçerdir. Bahalar deňeçer görünse-de, waksinanyň Türkiýäniň özünde öndüriljekdigi üçin ep-esli ýeňilligiň bolmagyna umyt bildirilýär.
Indi Türkiýe ABŞ we Ýewropa Bileleşigi tarapyndan rugsat berlen «Pfizer/BioNTech» waksinasynyň önümçiligi üçin ýüz tutýar.