Özbegistanyň Prezidenti Şawkat Mirziýoýew ekologiýa ulgamynda sebitleýin hyzmatdaşlygy güýçlendirmäge gönükdirilen başlangyçlar bilen çykyş etdi diýip, Gazagystanyň “Kazinform” agentligi habar berýär.
Hususan-da, ol ýurtlaryň biologik dürlüligini gorap saklamak üçin Merkezi Aziýanyň Gyzyl kitabyny bilelikde taýýarlamagy teklip etdi.
— Tebigaty goramagyň halkara bileleşiginiň Daşkentdäki Sebitleýin edarasy bu işiň utgaşdyryjysy bolup biler. Sebitiň Gyzyl kitaby diňe bir ýitip barýan görnüşleriň sanawy däl-de, eýsem bu ugurdaky bilelikdäki işimiz üçin täsirli platforma bolmalydyr — diýip, Şawkat Mirziýoýew belledi.
Şeýle hem Özbegistanyň Prezidenti “Ýaşyl uniwersitetiň” ýanyndaky Çölleşmä garşy göreşmek, gurakçylygyň öňüni almak we çäge-tozan tupanlary barada wagtyndan öň duýdurmak merkezine sebitleýin dereje bermegi teklip etdi.
Sebitde tehnologik geçişi çaltlandyrmak üçin Şawkat Mirziýoýew Merkezi Aziýanyň “ýaşyl söwda geçelgesini” kemala getirmek başlangyjyny öňe sürdi.
— Ýeňillikli gümrük düzgünleriniň girizilmegi we harytlaryň güwänamalarynyň özara ykrar edilmegi önümçiligi has çalt dörebaplaşdyrmaga hem-de önümlerimizi bäsleşige ukyply etmäge mümkinçilik berer — diýip, ol nygtady.
Mundan başga-da, Döwlet baştutany Merkezi Aziýanyň howa taslamalarynyň maýa goýum mümkinçiligini döretmegi, şeýle hem sebit ýurtlaryndaky ekologiýa amallaryna bitewi formatda gözegçilik etmäge mümkinçilik berjek daşky gurşawyň üýtgemeginiň ýeke-täk sebitleýin atlasyny taýýarlamagy teklip etdi.
