Futbol boýunça dünýä çempiony we argentin ýyldyzy Lionel Messi ABŞ-nyň “Inter Maýami” topary bilen ilkinji kubogyny gazandy. Liga kubogy ýaryşynyň finalynda “Inter Maýami” bilen “Neşwill” toparlary duşuşdy.
Liga kubogy – ABŞ-nyň we Meksikanyň futbol toparlarynyň arasynda geçirilýän ýaryş. Ol ilkinji gezek KONKAKAF tarapyndan resmi ýaryş hökmünde geçirildi. Bu ýaryşda ilkinji 3 orny eýelän toparlar 2024-nji ýylda KONKAKAF çempionlar kubogy ýaryşynda çykyş etmäge mümkinçilik alýar.
Duşuşygyň esasy wagty 1:1 hasabynda tamamlandy. Ýaryşyň ýeňijisini 11 metrlik jerime urgulary kesgitledi. Uzak wagtlap dowam eden 11 metrlik jerime urgularynyň netijesinde, ýagny 10:9 hasabynda Lionel Messili “Inter Maýami” ýeňiş gazandy. Messi täze toparynyň ähli duşuşyklarynda tapawutlanmagy başady.
Ol karýerasyndaky 44-nji kubogyny eýeledi. Şeýlelikde, Messi futbol taryhynda iň köp kubok gazanan futbolçy boldy. Mundan ozal, Dani Alwesiň 43 kubogy bardy.