Türkmenistanyň Ministrler Kabinetiniň Başlygynyň orunbasary Batyr Atdaýew bilen duşuşan Türkiýe Respublikasynyň Prezidentiniň orunbasary Jewdet Ýylmaz Türkiýäniň Hazar deňzindäki “Dostluk” känine aýratyn ähmiýet berýändigini belledi. Bu barada Türkiýäniň resmi habarlar gullugy habar berýär. Bu duşuşyk Türkmenistanyň Prezidentiniň şu gün Türkiýe Respublikasyna başlan ilkinji resmi saparynyň öňüsyrasynda geçirildi.
Türkiýäniň Hazar deňzindäki “Dostluk” käniniň özleşdirilmegine gyzyklanma bildirýändiklerini bellän Jewdet Ýylmaz bu ugurda işlere gatnaşmaga taýýardyklaryny hem belläp geçdi.
Şeýle hem Jewdet Ýylmaz Türkmenistanyň tebigy gazyny Türkiýäniň üsti bilen daşary ýurt bazarlaryna ibermek mümkinçiliginiň durmuşa geçirilmegi we energetika pudagynda gazanylan ylalaşygyň iş ýüzünde durmuşa geçirilmeginiň möhüm ähmiýetini belledi.
Türkiýäniň Prezidentiniň orunbasary mundan beýläk, Türkiýäniň “akylly” şäherler ýaly beýleki ugurlardaky tejribesini Türkmenistan bilen paýlaşyljakdygyny aýtdy.
Türkmenistanyň Ministrler Kabinetiniň Başlygynyň orunbasary Batyr Atdaýew hem öz gezeginde Iki ýurduň taryhy umumylyklaryna ünsi çekip, söwda möçberini 5 milliard dollara çenli ýokarlandyrmak üçin bilelikde işlejekdiklerini aýtdy.
Şeýle hem B.Atdaýew Türkiýäniň Türkmenistanyň möhüm söwda hyzmatdaşlaryndan biridigini aýtdy.
Hazar deňzindäki “Dostluk” känine bilelikde özleşdirmek babatda Türkmenistan bilen Azerbaýjanyň arasynda degişli ähtnama gol çekilipdi.