Ýewropanyň ilatynyň jan başyna düşýän girdejileri boýunça öňdebaryjy ýurtlaryň biri bolan Lýuksemburgda jemgyýetçilik ulaglary mugt bolar. Bu düzgüniň 1-nji martdan güýje girjekdigi habar berilýär.
Şeýlelikde Lýuksemburg dünýäde jemgyýetçilik ulaglary bolan otly, tramwaý we awtobuslaryň gatnaw bahasy mugt boljak ilkinji ýurt bolar. Bu düzgün 2018-nji ýyldan bäri meýilnamalaşdyrylyp gelinýär. Her ýyl 41 million ýewrolyk çykdajy göz öňünde tutulan bu düzgün köçe-ýol hereketiniň dyknyşygynyň kadalaşdyrylmagyna hem-de howa hapa gazlaryň goýberilmeginiň azaldylmagyna mümkinçilik berer.
2018-nji ýyldan bäri bu düzgüniň üstünde işleýän ýurduň hökümetiniň metbugat wekili Dani Frank bu maksatnamanyň esasy maksadynyň adamlaryň hususy ulaglaryndan el çekip, jemgyýetçilik ulaglarynyň hyzmatyndan peýdalanmagyny gazanmakdan ybaratdygyny belläp geçdi.