Amerikanyň işewüri we “Tesla we Space X” ýaly kompaniýalaryň ýolbaşçysy Ilon Mask “Saturday Night Live” agşamky aýdym-saz we degişme äheňindäki telegepleşigiň alyp baryjysy bolar. Bu barada “NBC” teleýaýlymy habar berýär. Mask 8-nji maýda ýaýlyma goýberilmegi meýilleşdirilýän gepleşige gatnaşar. Aýdymçy Maýli Saýrus gepleşikde aýdym-saz myhmany hökmünde çykyş eder.
“Saturday Night Live” agşamky aýdym-saz we degişme äheňindäki telegepleşik 1975-nji ýyldan bäri amerikanyň “NBC” teleýaýlymynda ýaýlyma goýberilip gelinýär. Bu gepleşik ABŞ telewideniýesiniň taryhynda iň meşhur we uzak wagtlap dowam edýän taslamalaryň biri hasaplanylýar. Umuman gepleşik degişme çykyşlardan we 1-2 sany saz çykyşlardan ybaratdyr. Hat-da bu gepleşik abraýly “Emmi” baýragyna birnäçe gezek dalaşgär görkezildi.