Doganlyga, özara hormata we strategik hyzmatdaşlyga esaslanýan Baku bilen Aşgabadyň arasyndaky hyzmatdaşlyk berkemegini dowam etdirýär. Bu barada Azerbaýjanyň Türkmenistandaky ilçisi Gismet Gözalow Türkmenistanyň daşary işler ministrliginiň ýolbaşçysy Raşid Meredowyň başlyklyk etmeginde geçirilen brifingde eden çykyşynyň jemleri boýunça «X» jemgyýetçilik torunda habar berdi.
Diplomat çykyşynyň dowamynda Türkmenistanyň daşary syýasatynyň ileri tutulýan ugurlaryna, şol sanda hemişelik bitaraplyk ugruna ünsi çekdi we ýurduň halkara giňişligindäki döredijilikli ornuny belledi.
Ilçiniň bellemegine görä, şeýle hem Türkmenistanyň daşary syýasat işjeňligini artdyrmak meselelerine, şol sanda 2026-njy ýylyň başyndan bäri amala aşyrylan daşary ýurt saparlaryna we duşuşyklaryna deglip geçildi.
«Men Azerbaýjan bilen Türkmenistanyň arasynda doganlyga, özara hormata we strategik hyzmatdaşlyga esaslanýan ýakyn hyzmatdaşlygyň berkeýändigini belledim» diýip, ol sözüniň üstüni ýetirdi.