Dünýäniň iň çalt ösýän şäherleriniň biri bolan Dubaýda «Näme üçin «akylly» lukmançylyk enjamlary bolup, «akylly» hassahana bolmaly dälmişin?» diýen sowala jogap berildi. Şäherde açylan «Fakeeh University Hospital» hassahanasy Ýer ýüzündäki az sanly «akylly» hassahanalaryň biridir.
350 orunlyk täze hassahana Birleşen Arap Emirlikleriniň hökümetine 1,5 milliard dirheme, başgaça aýtsak, Amerikanyň Birleşen Ştatlarynyň 411 million dollaryna düşdi.
Metbugat sahypalarynda berilýän habarlara görä, täze hassahanada lukmanlar bilen hassalaryň ýa-da hassalaryň hossarlarynyň arasyndaky aragatnaşyk ýörite planşetleriň üsti bilen alnyp barylýar. Ýöriteleşdirilen tehnologik merkez bolsa hassalara gije-gündiziň dowamynda gözegçilik edip durmaga mümkinçilik berýär.
Täze hassahana häzir bölekleýin açyldy. Ýöne 2021-nji ýylyň birinji çärýeginde onuň ähli bölümleriniň işläp başlamagyna garaşylýar. Saud Arabystanynyň «Fakeeh Care» kompaniýasy bilen bilelikde enjamlaşdyrylan hassahanada Germaniýada öndürilen döwrebap lukmançylyk enjamlary ornaşdyryldy. Onda 60 sany ýatakhana we 12 sany operasiýa otagy bolar.
Hassahanada «Siemens», «Philips» we «Cisco» ýaly öňdebaryjy kompaniýalaryň käbir «akylly» enjamlary ilkinji gezek peýdalanylar.
