Türkmenistanda ähli pudaklarda sanlylaşdyrmak işleri ýokary depginde alnyp barylýar. Şonuň netijesinde, köp sanly hyzmatlar onlaýn tertibinde amala aşyrylýar. Aşgabat şäher döwlet notarial edarasynyň hyzmatlaryndan peýdalanmak üçin onlaýn nobat hyzmaty ýola goýuldy. Munuň üçin Aşgabat şäher döwlet notarial edarasynyň “Notarial Online Nobat” goşundysy işe girizildi.
“orient.tm” internet neşiriniň habaryna görä, “Notarial Online Nobat” goşundysyny “Google Play”-den smartfonyňyza ýükläp alyp bilersiňiz. Şol ýerden hem öýüňizden çykman, zerur bolan bölüme nobata durup bilersiňiz. Adyňyzy we familiýaňyzy hem-de mobil telefon belgiňizi girip, nobata durmak bolar.
Nobata durandan soňra siziň telefon belgiňize SMS-habarnamasy arkaly nobat belgisi geler, “QR” kod bilen nobata duran bölümiňize baryp bilersiňiz.
Bu hyzmat arkaly öz nobatyňyzy onlaýn yzarlap bilersiňiz, şeýle hem nobatyňyzyň golaýlaýandygyny habar berýän awtomatiki SMS-habarnama hyzmaty hem bar.
Bu goşunda häzirki wagtda diňe türkmen dilinde elýeterlidir. Şol goşundyda «Nobat al», «Häzirki nobaty bil» we «Meniň nobatlarym» bölümleri bar.