Türkmenistanyň futbol boýunça Olimpiýa ýygyndysy Aziýanyň kubogy — 2024-iň saýlama tapgyrynyň ilkinji duşuşygynda uly hasap bilen ýeňiş gazandy. Türkmenistanly futbolçylar Indoneziýanyň Surakarta şäherinde geçirilen duşuşykda Hytaý Taýpeýiniň ýygyndysyny 4:0 hasabynda ýeňlişe sezewar etdiler.
Bu duşuşykdaky gollaryň üçüsini paýtagtymyzyň «Köpetdagynyň» hüjümçisi Şamämmet Hydyrow öz adyna ýazdyrdy. Ýygyndy toparymyzyň dördünji topuny «Altyn Asyryň» wekili Nurmyrat Rozyýew geçirmegi başardy.
Ýaşlar ýygyndymyzyň Aziýa Kubogy – 2024-iň saýlama tapgyrynyň «K» toparçasynda çykyş edýändigini ýatladýarys. Ýygyndy toparymyz saýlama tapgyryndaky ikinji duşuşygyny 12-nji sentýabrda Indoneziýanyň ýaşlar ýygyndysynyň garşysyna geçirer. Yklym ýaryşynyň final tapgyry 2024-nji ýylyň 15-nji apreli bilen 3-nji maýy aralygynda Katarda geçiriler.
Saýlama tapgyryndaky toparçalaryň 11-isiniň ýeňijileri we ikinji orny eýelän ýygyndylaryň iň gowy dördüsi yklym ýaryşynda çykyş etmäge hukuk gazanar.