Türkmenistanyň daşary işler ministri Raşid Meredow Jibuti Respublikasynyň daşary işler ministri Mahmud Ali Ýusuf bilen telefon arkaly söhbetdeşlik geçirdi.
Gepleşikleriň dowamynda taraplar iki ýurduň arasyndaky syýasy-diplomatik we ykdysady gatnaşyklary mundan beýläk-de giňeltmegiň möhümdigini nygtadylar.
Ministrler iki ýurduň halkara guramalarynyň, ilkinji nobatda-da, Birleşen Milletler Guramasynyň we Yslam Hyzmatdaşlyk Guramasynyň çäklerindäki hyzmatdaşlygynyň häzirki derejesine ýokary baha berdiler, parahatçylygy we durnukly ösüşi pugtalandyrmak meseleleri boýunça garaýyşlarynyň meňzeşdigini belläp geçdiler.
Taraplar şeýle hem 2025-nji ýylyň dekabr aýynda Aşgabat şäherinde geçirilmegi meýilleşdirilýän Halkara Parahatçylyk we ynamyşmak forumyna taýýarlyk görmek barada pikir alyşdylar.