Merkezi Aziýa ýurtlary we Azerbaýjan özara söwdadan bilelikdäki önümçiligiň soňky önümlerine geçmeli, bitewi senagat we tehnologik zynjyrlary ösdürmeli.
Bu barada Özbegistanyň Prezidenti Şawkat Mirziýoýew Merkezi Aziýa ýurtlarynyň we Azerbaýjanyň döwlet Baştutanlarynyň Awazada geçirilen VIII Konsultatiw duşuşygynda aýtdy.
Onuň bellemegine görä, sebit ýurtlarynyň ykdysady hyzmatdaşlygy täze derejä çykarylmalydyr. Munuň üçin özara söwdany we maýa goýumlaryny artdyrmagyň anyk mehanizmlerini kesgitlemek zerurdyr.
«Ilki bilen, iri taslamalary has çalt durmuşa geçirmäge mümkinçilik berjek bilelikdäki senagat we tehnologik zynjyrlar, umumy sanly hyzmatlar hem-de maýa goýum mehanizmleri barada gürrüň gidýär», diýip Mirziýoýew aýtdy.
Özbegistanyň Prezidenti 2035-nji ýyla çenli söwda-ykdysady hyzmatdaşlygyň toplumlaýyn sebit maksatnamasyny işläp taýýarlamagyň möhümdigini belledi. Onuň sözlerine görä, bu maksatnama sebitiň esasy artykmaçlygy bolan umumy geografik ýerleşişden netijeli peýdalanmak üçin amaly gural bolmalydyr.
«Söwdadaky päsgelçilikleri yzygiderli aradan aýyrmak, senagat kooperasiýasyny giňeltmek we iri bilelikdäki taslamalary durmuşa geçirmek zerurdyr. Biz indi biri-birimiz bilen adaty söwdanyň ýeterlik bolmadyk döwrüne ýetdik. Bilelikde soňky önümi döretmeli. “Alty ykdysadyýet — bir önüm” formulasy biziň nämä ymtylmalydygymyzyň manysyny gowy beýan edýär», diýip döwlet Baştutany nygtady.
Mirziýoýew birnäçe ýurduň kärhanalarynyň bitewi önümçilik zynjyryna gatnaşmagynyň döwletleriň ykdysadyýetleriniň arasynda has berk gatnaşyklary döretmäge mümkinçilik berjekdigini aýtdy.
Bu ugry ösdürmek maksady bilen ol 2027-nji ýylda Özbegistanda Merkezi Aziýa we Azerbaýjan ýurtlarynyň işewürlik forumyny geçirmegi teklip etdi.