Birleşen Arap Emirliklerinde okuw türgenleşigini geçýän Türkmenistanyň çempiony “Arkadag” topary Russiýanyň güýçli topary “Zenit” bilen ýoldaşlyk duşuşygyny geçirdi. Duşuşyk 1:1 hasabynda deňme-deň tamamlandy.
Russiýanyň birnäçe gezek çempiony “Zenit” toparyndan Wilson Izidor tapawutlandy. «Arkadag» toparynyň futbolçysy Altymyrat Annadurdyýew 11 metrlik jerime urgusyndan peýdalandy.
Ozal, Türkmenistanyň çempiony «Arkadag» futbol topary BAE-däki okuw-türgenleşik ýygnanyşygynyň çäginde Russiýanyň «Pari NN» topary bilen ýoldaşlyk duşuşygyny geçirip, bu topary ýeňmegi başarypdy.
Şeýlelikde, “Arkadag” topary bu okuw-türgenleşiginiň çäklerinde güýçli toparlar bilen güýç synanyşyp, oňat netijeler görkezdi. Wladimir Baýramowyň şägirtleri dünýäniň dürli ýurtlarynyň futbol toparlary bilen ýoldaşlyk duşuşyklaryny geçirip, uly tejribe topladylar.