Amerikan tarapynyň başlangyjy bilen 2025-nji ýylyň 22-nji iýunynda Türkmenistanyň daşary işler ministri Raşid Meredow bilen ABŞ-nyň Döwlet sekretarynyň birinji orunbasary Kristofer Landau arasynda telefon söhbetdeşligi boldy. Şol söhbetdeşlikde taraplar Türkmenistan bilen Amerikanyň Birleşen Ştatlarynyň arasynda syýasy, söwda, ykdysady, durmuş-medeni we beýleki ugurlarda köp ýyllyk oňyn tejribäni nygtadylar.
Iki ýurduň daşary syýasat edaralarynyň ýolbaşçylary özara gyzyklanýan halkara we sebit meselelerini ara alyp maslahatlaşdylar. Hususan-da, Ýakyn Gündogar sebitindäki häzirki ýagdaý we bu ugurda birnäçe ynsanperwer meseleleriň çözülmegi barada pikir alyşdylar.
Şol bir wagtyň özünde, Birleşen Milletler Guramasy tarapyndan wekilçilik edilýän dünýä jemgyýetçiligi tarapyndan üç gezek bitarap derejesi ykrar edilen döwlet hökmünde Türkmenistanyň halkara işlerinde işjeň we konstruktiw rol oýnaýandygy aýratyn nygtaldy.
Şunuň bilen baglylykda, türkmen tarapy islendik halkara meselelerini parahatçylykly çözmek ýörelgelerine berk eýerip, diplomatiýa serişdeleriniň we usullarynyň iň giň gerimini ulanmak arkaly Ýakyn Gündogardaky häzirki ýagdaýy çözmäge gatnaşmaga taýýardygyny mälim etdi.
Türkmenistanyň Daşary işler ministrliginiň ýolbaşçylary bilen ABŞ-nyň Döwlet departamentiniň arasynda telefon arkaly söhbetdeşlik dostlukly we konstruktiw ýagdaýda geçirildi.
Türkmenistanyň Daşary işler ministrligi
2025-nji ýylyň 22-nji iýuny