Türkmenistanyň nebitgaz toplumynda “Türkmengaz” döwlet konserniniň ýolbaşçylary bilen Türkiýe Respublikasynyň “BOTAŞ” kompaniýasynyň baş direktory Abdulwahid Fidanyň ýolbaşçylygyndaky wekiliýet bilen duşuşyk geçirildi. Bu barada Halkara habarlar merkezi habar berýär.
Duşuşygyň esasy mowzuklarynyň biri Türkmenistanyň tebigy gazyny Türkiýä ibermegiň eksport ugurlaryny kämilleşdirmek meselesi boldy.
Türkiýe Respublikasynyň “BOTAŞ” kompaniýasynyň wekiliýeti tebigy gazyň iberilýän ugurlaryny giňeltmek we infrastrukturasyny döwrebaplaşdyrmaga hemmetaraplaýyn goldaw bermäge taýýardyklaryny bellediler. Munuň özi türkmen “mawy” ýangyjynyň türk hem-de dünýä bazaryna durnukly ibermäge giň mümkinçilikler döreder.
Şeýle hem gepleşikleriň barşynda bilelikdäki taslamalary netijeli durmuşa geçirmek hem-de energetika hyzmatdaşlygyny pugtalandyrmak babatda iki ýurduň döwlet kompaniýalarynyň arasyndaky yzygiderli duşuşyklaryň ähmiýeti bellenildi.
Mundan ozal hem, Türkiýe Respublikasynyň “BOTAŞ” kompaniýasynyň baş direktory Abdulwahid Fidanyň ýolbaşçylygyndaky wekiliýet Türkmenistanda birnäçe gezek saparda bolupdy.