Mälim bolşy ýaly, ýurdumyzyň çäginde howada tozan bölejikleriniň bardygy sebäpli howa şertleriniň adam bedenine ýaramaz täsiriniň öňüni almak maksady bilen agyz-burun örtüklerini dakynmak maslahat berilýär. Şonuň üçin ýurdumyzyň köçelerinde bir gezeklik lukmançylyk agyz-burun örtüklerinden hem-de köp gezeklik dokma toplumlarynda öndürilen agyz-burun örtüklerinden peýdalanýanlary görmek bolýar.
“Neýtralnyý Türkmenistan” gazetinde çap edilen makalada bellenişi ýaly, ýurdumyzyň Dokma senagaty ministrligi bilen Türkmenistanyň Ylymlar akademiýasy Tehnologiýalar merkeziniň arasynda ýörite ylalaşyk baglaşylyp, şonuň netijesinde köp gezeklik agyz-burun örtükleri babatda barlag işlerini geçirdiler.
Birnäçe laboratoriýa barlaglarynyň netijesinde, türkmen alymlary tozandan goramak üçin gaýtadan ulanylýan örtükleri dakynmagyň geýmegiň netijeligini subut etdiler. Laboratoriýada S.A. Türkmenbaşy dokma toplumynda trikotaž hem-de flanel matadan tikilen köp gatly örtükler boýunça barlaglar geçirildi. Hünärmenler bu örtükleriň ykdysady nukdaýnazardan hem peýdaly bolup biljekdigini bellediler. Bu şahsy gorag enjamlaryny geýmegiň howadaky ýokary tozanly gurşawda möhümdigi nygtaldy.
Degişli barlag işlerinde mikrobiologiki arassalygy, süýümiň gurluş aýratynlyklary, örtükleriň dykyzlygy we çyglylygy öwrenildi.
Netijede, ähli önümleriň zerur önümçilik ülňülerine laýyk gelýändigi ýüze çykaryldy. Mundan başga-da, örtügiň dizaýny täsirli goragy üpjün edýändigi, ýüzüň burun sebitiniň anatomiki aýratynlyklaryna gabat gelýändigi hem-de ulanylanda oňaýsyzlyk döretmeýändigi mälim edildi.