Tokiodaky tomusky Olimpiýa oýunlarynda ýeňil atletika ugry boýunça gyzykly hem-de çekeleşikli ýaryşlar dowam edýär. Ýeňil atletikanyň birnäçe ugry boýunça medallar gazanylýar.
100 METR ARALYGY BARÝERLI YLGAMAK
100 metr aralygy barýerli ylgamak ýaryşynda Puerto-Rikonyň türgeni Kamaço-Kuinn altyn medalyň eýesi boldy. Ýeňiji bu aralygy 12,37 sekuntda geçmegi başardy. Ikinji orny amerikaly Kendra Harrison, üçünji orny bolsa ýamaýkaly Megan Tapper eýeledi.
Puerto-Rikonyň türgenleri ýurduň taryhynda ikinji gezek altyn medal gazandy. Mundan ozalky altyn medaly 2016-njy ýyldaky Olimpiýa oýunlarynda tennisçi Monika Puig gazanypdy.
24 ýaşly Kamaço-Kuinn sportuň bu görnüşi boýunça öňdebaryjy türgenleriň biri hasaplanýar.
GRESIÝALY TÜRGEN ALTYN MEDAL GAZANDY
Gresiýaly türgen Miltiadis Tentoglu uzak aralyga bökmek ýaryşynda altyn medal gazandy. Ol 8,14 metr aralyga böküp, birinji orny eýeledi. bu ugurda ikinji orny kubaly Huan Migel Eçewarriýa eýeläp, üçünji orny hem ýene-de kubaly Maýkel Masso gazandy.
23 ýaşyndaky Tentoglu 2018-nji ýylda Ýewropada hem çempion bolupdy.
ITALIÝALY TÜRGENDEN GARAŞYLMADYK ÝEŇIŞ
Italiýaly ýeňil atletikaçy Marsel Jeýkobs 100 metr aralyga ylgamakda altyn medal gazandy. Ol bu aralygy 9,80 sekuntda geçmegi başardy. Ikinji orny amerikaly Fred Kreli, üçünji orny bolsa kanadaly Andre de Grass gazandy.
26 ýaşyndaky Jeýkobs 2021-nji ýylda ýapyk binalarda geçirilen Ýewropa çempionatynda hem ýeňiş gazanypdy. Ol Olimpiýa oýunlarynda 100 metr aralyga ylgamakda altyn medal gazanan ilkinji italiýaly hem-de 1992-nji ýyldan bäri Olimpiýa oýunlarynda bu ugurda gazanan ilkinji ýewropalydyr.