Özbegistanyň futbol boýunça milli ýygyndysy taryhynda ilkinji gezek futbol boýunça dünýä çempionatynda çykyş etmek hukugyna eýe boldy. Aziýanyň Futbol Konfederasiýasynyň düzüminde çykyş edýän Özbegistanyň milli ýygyndysy 2026-njy ýylda geçiriljek dünýä çempionatyna gatnaşmak üçin saýlama tapgyrynda güýç synanyşdy.
“A” toparçada çykyş eden Özbegistanyň milli ýygyndysy Eýranyň ýygyndysyndan soňra bu toparçadan gönüden-göni dünýä çempionatyna gatnaşmaga hukuk alan ýygyndy boldy. Toparçanyň 9-njy tapgyrynda Birleşen Arap Emirlikleri bilen myhmançylykda duşuşan Özbegistanyň milli ýygyndysy 0:0 hasabynda deňme-deň oýnap, utuklarynyň sanyny 18-e ýetirdi. Toparçadaky 3-nji orundaky BAE-niň bolsa, 14 utugy bar.
Toparçada diňe bir duşuşyk galdy. 10-njy iýunda Özbegistan öz meýdançasynda Katary kabul eder. Bu toparçada birinji orny 20 utuk bilen Eýranyň ýygyndysy eýeleýär.
Eýran bilen bir hatarda Ýaponiýa, Täze Zelandiýa we Argentina 2026-njy ýylda geçiriljek dünýä çempionatyna gatnaşmak hukugyna eýe bolupdy.
Özbegistanyň milli ýygyndysy ilkinji duşuşygyny 1992-nji ýylda geçirdi we 1994-nji ýylda Aziýanyň Futbol Konfederasiýasynyň hem-de Halkara Futbol Federasiýasynyň agzalygyna goşuldy.
Şeýlelikde, Merkezi Aziýada dünýä çempionatyna gatnaşmak hukugyna ilkinji bolup, Özbegistan eýe boldy.
2026-njy ýylda dünýä çempionaty 11-nji iýun-19-njy iýul aralygynda ABŞ, Meksika we Kanada döwletlerinde geçiriler.