Gyrgyz Respublikasynyň Prezidenti Sadyr Žaparow 29-njy oktýabrda Türkiýe Respublikasyna amala aşyrýan iş saparynyň çäklerinde Türki dünýäsiniň iň ýokary ordeni bilen sylaglandy.
Prezident Sadyr Žaparowy Türki dünýäsiniň iň ýokary ordeni bilen sylaglamak baradaky karar Türki Döwletleriň Guramasyna agza ýurtlaryň (Azerbaýjan, Gazagystan, Türkiýe we Özbegistan) döwlet Baştutanlary tarapyndan kabul edildi.
Sylagy Türkiýe Respublikasynyň Prezidenti Rejep Taýyp Ärdogan gowşurdy.
Sylag gowşurylyş dabarasy Ankara şäherindäki Prezident köşgünde Türki Döwletleriň Guramasynyň (TDG) 13-nji sammitiniň çäklerinde geçirildi.
Prezident Sadyr Žaparow özüne «Türki dünýäsiniň iň ýokary ordeniniň» gowşurylmagynyň uly hormatdygyny we çuňňur sarpanyň nyşanydygyny belledi.
Döwlet Baştutany bu sylagy diňe bir şahsy hyzmatlarynyň ykrar edilmegi hökmünde däl, eýsem, gyrgyz halkynyň türki dünýäsiniň agzybirligini berkitmäge we doganlyk döwletleriň arasyndaky köptaraplaýyn hyzmatdaşlygy ösdürmäge goşýan goşandyna berlen ýokary baha hökmünde kabul edýändigini nygtady.
«Bizi köpasyrlyk umumy taryhymyz, bitewi ruhy gymmatlyklarymyz, dillerimiziň we medeniýetlerimiziň ýakynlygy birleşdirýär. Bu biziň bahasyna ýetip bolmajak mirasymyz hem-de agzybirligimiziň we jebisligimiziň berk binýadydyr» diýip, Prezident belledi.
Şeýle hem ol sylaglamak baradaky karary kabul eden Türki döwletleriniň guramasyna agza ýurtlaryň liderlerine çuňňur minnetdarlygyny bildirip, bu ordeniň türki dünýäsiniň röwşen geljegine bolan umumy ynamy alamatlandyrýandygyny nygtady.
Sözüniň ahyrynda döwlet Baştutany doganlyk ýurtlara parahatçylyk we gülläp ösüş, halklaryna bolsa abadançylyk arzuw edip, olaryň arasyndaky ebedi doganlygy gorap saklamagyň möhümdigini belledi.