Ýewropa yklymynda futbol toparlarynyň arasynda 3 sany iri ýaryş guralýar. Olaryň birinji Çempionlar ligasy, ikinjisi Ýewropa Ligasy, üçünjisi bolsa Konferensiýa Ligasydyr. Bu ýaryşlar Ýewropa Futbol Assosiasiýalarynyň Geňeşi, ýagny UEFa tarapyndan guralýar.
UEFA-nyň Ýewropa Ligasynyň finaly geçirilip, onda Italiýanyň “Atalanta” topary kubogy gazandy. Düýn bolsa, üçünji derejedäki ýaryş, ýagny UEFA-nyň Konferensiýa Ligasynyň kubogyny almak ugrundaky ýaryşyň finaly geçirildi.
Onda Gresiýanyň “Olimpiakos” bilen Italiýanyň “Fiorentina” toparlary duşuşdy. Duşuşyk 1:0 hasabynda grek toparynyň peýdasyna tamamlandy. Afinyda geçirilen duşuşygyň ýeke-täk goluny 116-njy minutda Aýub El-Kaabi öz adyna ýazdyrdy.
Şeýlelikde, “Olimpiakos” topary Gresiýada Ýewropa kubogyny gazanan ilkinji topar boldy. Mundan ozal, Gresiýanyň “Panatinaikos” topary 1970/71-nji ýylyň möwsüminde Çempionlar ligasynyň finalyna çykypdy. Şeýle hem bu topar 2 gezek ýarym finala çykmagy başarypdy. AEK topary hem UEFA-nyň Kubogyna ýarym finala çykypdy. Ýöne bu grek toparlaryna kubok almak başartmandy.
“Olimpiakos” toparynyň ispan tälimiçisi Hose Luis Mendilibar bassyr 2-nji ýyl Ýewropanyň kubogyny gazandy. Geçen möwsümde ol “Sewilýa” topary bilen UEFA-nyň Ýewropa Ligasynyň kubogyny gazanypdy.
Grek topary bu gazanan üstünligi bilen geljek möwsümde Ýewropa Ligasyna gatnaşar.
Konferensiýa Ligasy 3 ýyldan bäri geçirilip gelinýär we 3-nji derejeli kubok ýaryşy bolup durýär. bu kubogy ilkinji bolup, 2021/22-nji möwsümde Italiýanyň “Roma” topary gazanypdy.