4-6-njy iýun aralygynda Moskwada Türkmenistanyň Medeniýet günleri geçiriler. Bu çäre Russiýanyň paýtagtynyň ýaşaýjylaryna we myhmanlaryna türkmen halkynyň baý däp-dessurlary we sungaty bilen ýakyndan tanyşmaga mümkinçilik berer.
Bu waka iki döwletiň degişli Medeniýet ministrlikleri tarapyndan, Türkmenistanyň RF-däki Ilçihanasynyň we «Roskonsert» federal döwlet býujet medeniýet edarasynyň goldamagynda guralar.
Saz we teatr sungatynyň muşdaklary üçin baý mazmunly medeni maksatnama taýýarlanyldy. Türkmen artistleriniň wokal we horeografiýa çykyşlary paýtagtyň meşhur sahnalarynyň ikisinde geçiriler.
Guraljak çärelerde konsertlerden başga-da, myhmanlara özboluşly tematik sergiler garaşýar. Medeniýet günleriniň çäklerinde şekillendiriş we amaly-haşam sungatynyň sergileri guralyp, olar türkmen halkynyň gadymy milli senetçiligini we asyrlar aşyp gelen däp-dessurlaryny aýdyň görkezer.