Türkmenistana Magtymguly Pyragynyň golýazmalar toplumynyň “Dünýäniň hakydasy” maksatnamasynyň halkara sanawyna girizilendigi barada şahadatnamalar dabaraly ýagdaýda gowşuryldy. Bu barada Halkara habarlar merkezi habar berýär.
Bu çärä BMG-nyň Türkmenistandaky utgaşdyryjysy Dmitriý Şlapaçenko, Türkmenistanyň Medeniýet ministrliginiň wekilleri, Magtymguly adyndaky edebiýat we milli golýazmalar institutynyň hünärmenleri, alymlar , professorlar we talyp ýaşlar gatnaşdy. Çäräniň başynda döredijilik işgärleri Magtymguly Pyragynyň döredijilik durmuşynyň pursatlaryndan birini görkezdiler.
Bu dabaraly çäre şahadatnamanyň hödürlenmegi bilen dowam etdi . BMG-nyň Türkmenistandaky utgaşdyryjysy Dmitriý Şlapaçenko medeniýet ministrine we Türkmenistan Ylymlar akademiýasynyň ýolbaşçysyna degişli şahadatnamalary dabaraly ýagdaýda gowşurdy.
Beýik türkmen şahyry Magtymguly Pyragynyň goşgular ýygyndysynda XVIII-XIX asyrlarda Türkmenistanda ýaýran eserleriniň saklanyp galan golýazmalary girizildi. Bu türkmen halkynyň we tutuş Türki dilli halklaryň, Merkezi Aziýanyň we Ýewropa edebiýatynyň dilden we ýazmaça mirasyndan seýrek mysal. Magtymgulynyň goşgulary ynsanperwerlik, watançylygyň, agzybirligiň we jebisligiň şygary ýaly bolup görünýär we bu köp ýurtlaryň alymlary we şahyrlary üçin gollanma boldy. Ýygyndylar 80-den gowrak diwandan ybarat.
Çärede çykyş edenler Magtymguly Pyragynyň goşgular ýygyndysynyň ÝUNESKO-nyň “Dünýäniň hakydasy” maksatnamasynyň halkara sanawyna girizilmeginiň häzirki wagtda bütin dünýäde ähmiýetiniň alamatydygyny bellediler.
1992-nji ýylda döredilen bu meýilnama ýurtlaryň we halklaryň gadymy ýazuw ýadygärliklerini goramak üçin halkara taslama bolup – kagyz, audiowizual, sanly we beýleki formatlarda möhüm we hemişelik ähmiýete eýe bolan resminamalar ýygyndylarydyr.
Bu dabaraly çäre medeniýet we sungat ussatlarynyň ýerine ýetiren aýdym-sazlary bilen tamamlandy.