Ýakynda, Mary welaýatynyň Sakarçäge etrabyndaky «Bagtyýar nesil» atly 4-nji çagalar bakja-bagynyň terbiýeçi-usulyýetçisi Orazbibi Muhammetdurdyýewa Magtymguly Pyragynyň doglan gününiň 300 ýyllygy mynasybetli usuly sagat geçirdi. Çagalar bakja-bagynyň bilim işgärleriniň terbiýeçileriniň, daşary ýurt dili mugallymlarynyň we aýdym-saz ýolbaşçysynyň gatnaşmagynda geçrilen nobatdaky usuly sagadyň temasy «Sanly ulgamdan peýdalanyp Gündogaryň akyldar şahyry Magtymguly Pyragynyň goşgularyny okuw-terbiýeçilik, usuly-guramaçylyk işlerinde peýdalanmagyň ýörelgeleri» diýip atlandyrylýar. Bu temada usuly sagadyň sanly serişdeler esasynda geçirilmegi ýurdumyzyň mekdebe çenli çagalar edaralarynda şanly senä bagyşlanyp guralýan usuly ugurlary işleriň ilkinjilerileriniň hataryndadygyny bellemek gerek.
Sanly ulgamyň şertlerinde guralan bu usulyýet ugurly çärede şahyryň ömrüne we döredijiligine bagyşlanan audio-wideo serişdeler we ekran eserleri işjeň peýdalanyldy. Usuly sagadyň çykyşlarynda presentasiýalara,görkezme serişdelere we tema degişli neşirlere aýratyn orun berildi.
Cykyşlarda Magtymguly Pyragynyň döredijiliginiň terbiýeçilik ähmiýetine, ony okuw-usulyýet, guramaçylyk işlerinde peýdalanmak mümkinçiligine ünsi çekip şahyryň okuw Maksatnamasy esasynda geçilýän sapaklarda, sözleýiş dilini ösdürmekde, daş-töwerek we tebigat bilen tanyşdyrmakda, ýönekeý matematik düşünjeleri berkitmekde, bedenterbiýede, gyzyklanma, göwnaçma çärelerinde, baýramçylyklarda we tutuş Gün pursatlarynda terbiýeçilik mazmunly setirleriň ýokary ähmiýeti barada bellenildi. Şular babatda ýöredilýän iş depderlerinde, resminamalarda we sapak ýazgylarynda beýan etmegiň usullaryna düşündiriş berildi.Esasanda Magtymguly Pyragynyň edebi mirasyny we baý döredijiligini öwrenmekde Gahryman Arkadagymyzyň kitaplarynyň, «Pähim-paýhas ummany Magtymguly Pyragy» atly şahyrana eseriniň bilim işgärleri üçin ajaýyp gollanmalar bolup durýandygy nygtaldy.
Elbetde, şeýle gymmatly gollanmalara, Magtymguly atamyzyň goşgularyna salgylanyp sapagyň guramaçylyk döwrüni, täze temany berkitmegi we beýleki ugurdaş okuw işlerini mazmunly we oňyn hilli alyp barmak bolar. Şoňa görä-de ýaş nesilleri milli ruhda terbiýelemekde, olary medeniýetli, sowatly ýaşlar hökmünde kemala getirmekde şahyryň eserleri baý çeşme hasaplanylýar.
Ýeri gelende bellesek, sanly serişdelerden peýdalanyp guralan bu usuly sagat bilim işgärleriniň hünärini kämilleşdirmekde, terbiýeçilere usuly kömek bermekde, Magtymguly Pyragynyň doglan gününiň 300 ýyllygy bilen bagly çärelere mynasyp ses goşmakda oňyn ähmiýete eýedir.