Amerikanyň Birleşen Ştatlarynda noýabrda geçiriljek prezident saýlawlary öňüsyrasynda gyzgalaňly wakalar bolup geçýär. Ilki bilen, ABŞ-nyň häzirki Prezidenti Jo Baýden dalaşgär bolmakdan ýüz öwrüp, özüniň wise-prezidenti Kamala Harrisiň dalaşgärligini goldady. Kamala Harrisiň Demokratik partiýasyndan dalaşgärligi resmi taýdan tassyklandy.
Şol bir wagtda prezident saýlawlaryna garaşsyz dalaşgär hökmünde gatnaşmagy meýilleşdiren Robert F.Kennedi hem dalaşgär bolmakdan ýüz öwürdi. Ol prezident saýlawlarynyň öňýanyndaky möwsümde Respublikanlar partiýasynyň dalaşgäri Donald Trampa goldaw bermegi göz öňünde tutýär.
Robert F. Kennedi-kiçisi Amerikanyň meşhur Kennedi maşgalasynyň agzasydyr.
70 ýaşyndaky Robert Kennedi daşky gurşaw meseleleri boýunça hukukçydyr. Ol Nýu-Ýorkuň ozalky senatory, ABŞ-nyň baş prokurory Robert Kennediniň ogly we ABŞ-nyň 35-nji Prezidenti Jon F. Kennediniň ýegenidir.
Kennediniň bu karary prezidentlik ýaryşynda deňagramlyklary üýtgedip biljek möhüm waka hökmünde garalýar.