Türkiýe Respublikasynyň Prezidentiniň orunbasary Jewdet Ýylmaz Türkmenistanda saparda bolýar we saparyň çäklerinde Türkmenistanyň Söwda-senagat edarasynyň sergiler zalynda geçirilen Türkiýe Respublikasynyň eksport harytlarynyň sergisine gatnaşdy.
Serginiň açylyş dabarasynda çykyş eden Türkiýäniň wise-prezidenti Türkiýäniň Türkmenistandaky maýa goýumlarynyň 147 million dollara deň bolandygyny belläp, “Türkiýäniň gurluşyk kompaniýalary häzirki wagta çenli Türkmenistanda 51 milliard dollar möçberinde 1080 taslamany durmuşa geçirdiler hem-de Türkmenistanyň örän uly ähmiýetli desgalarynyň gurluşygyny amala aşyrdylar” – diýip belledi.
Iki ýurduň arasyndaky hyzmatdaşlygyň has-da ösdürilýändigini bellän Jewdet Ýylmaz Türkmenistan bilen Türkiýäniň arasyndaky ykdysady gatnaşyklaryň okgunly ösüşine uly kanagatlanma bildirdi.
Türkiýäniň wise-prezidenti ikitaraplaýyn söwda gatnaşyklarynyň yzygiderli ösýändigine ünsi çekip, Türkiýäniň Türkmenistanyň eksportunda ikinji, importunda bolsa, birinji orunda durýandygyny hem-de iň möhüm söwda hyzmatdaşlarynyň biridiginiň guwandyryjy wakadygyny aýtdy.
2022-nji ýylda söwda dolanyşygynyň 2 milliard dollardan gowrak bolandygyny aýdan Jewdet Ýylmaz Türkmenistanyň we Türkiýäniň Prezidentleriniň görkezmeleri esasynda bu görkezijini 5 milliard dollara ýetirmek ugrunda degişli işleriň alnyp barylýandygyny belläp geçdi.
Aşgabatda geçirilen Türkiýäniň eksport harytlarynyň sergisiniň türk kompaniýalaryna Türkmenistanyň bazarynda öz mümkinçiliklerini tanyşdyrmaga giň şertler döredýändigini bellän wise-prezident Jewdet Ýylmaz türkmen kompaniýalaryna hem ýokary hilli türk önümleri bilen ýakyndan tanyşmaga şert döredýändigini aýtdy.
Jewdet Ýylmaz 2018-nji ýylda geçirilen sergä 60 kompaniýa gatnaşan bolsa, bu gezekki ykdysayd gözden geçiriş çäresine 100-e golaý kompaniýanyň gatnaşýandygyny belläp geçdi.