Hans-Diter Flik Germaniýanyň futbol boýunça milli ýygyndysynyň baş tälimçisi wezipesinden boşadyldy. Germaniýanyň futbol geňeşiniň ýolbaşçy düzüminiň teklibi bilen 58 ýaşyndaky hünärmen bilen şertnama ýatyryldy.
– Geňeş ýygyndynyň soňky gazanan şowsuzlyklary sebäpli oňa täze itergi bermek üçin degişli çözgüt kabul etdi. Germaniýada geçiriljek ýewropa çempionatyna ynamly taýýarlyk görmek zerur – diýlip, metbugat beýanatynda bellenilýär.
Flik 2021-nji ýylda Germaniýanyň futbol boýunça milli ýygyndysynyň baş tälimçisi wezipesine bellendi. Onuň ýolbaşçylygynda Germaniýanyň futbol boýunça milli ýygyndysynyň Katarda geçirilen dünýä çempionatynda toparçadan çykyp bilmedi.
Soňky 5 duşuşykda Germaniýanyň ýygyndysy 4 gezek ýeňildi we bir duşuşyk deňme-deň tamamlandy. Soňky geçirilen duşuşykda bolsa, Germaniýanyň ýygyndysy Ýaponiýadan 4:1 hasabynda utuldy.
Fransiýa bilen geçiriljek duşuşykda ýygyndynyň sport boýunça direktory Rudi Feller baş tälimçiniň wezipesini wagtlaýyn alyp barar.
Germaniýanyň futbol boýunça milli ýygyndysynyň tälimçisi wezipesine Ýulian Nagelsmannyň bellemegine garaşylýar.
