Garaşsyz Döwletleriň Arkalaşygynyň synçylar topary Türkmenistanda geçiriljek parlament saýlawlaryna gatnaşar. Synçy toparyna GDA-nyň baş sekretary Sergeý Lebedew ýolbaşçylyk eder. Bu barada GDA-nyň Ýerine ýetiriji komitetiniň metbugat gullugy habar berdi.
– Türkmenistanda geçiriljek Mejlisiň deputatlarynyň saýlawlary üçin bu ýurda gitjek GDA-nyň synçylar toparyna guramanyň baş sekretary Sergeý Lebedew ýolbaşçylyk eder. Onuň dalaşgärligi Arkalaşyga gatnaşyjy döwletleri hemişlik wekilleriniň Geňeşi tarapyndan tassyklandy – diýlip metbugat beýanatynda bellenilýär.
Metbugat beýanatynda bellenilip geçilişine görä, GDA-nyň synçylar topary ozalky saýlaw möwsümlerindäki ýaly öz işlerini alyp bararlar. Synçylar topary Türkmenistanyň Daşary işler ministrliginiň çagyrmagy boýunça Türkmenistanda bolarlar.
Türkmenistanda Mejlisiň deputatlarynyň saýlawlary 26-njy martda geçiriler.