Garaşsyz Döwletleriň Arkalaşygyna (GDA) agza ýurtlaryň Hökümet Baştutanlarynyň Geňeşiniň nobatdaky mejlisi 22-nji maýda Aşgabat şäherinde, Türkmenistanyň Arkalaşyga başlyklyk edýän döwründe geçiriler.
Bu barada GDA-nyň Baş sekretarynyň birinji orunbasary Igor Petrişenko Minsk şäherinde guramanyň Hemişelik doly ygtyýarly wekilleriniň geňeşiniň mejlisinde aýtdy.
Onuň bellemegine görä, häzirki wagtda gün tertibine 11 meseläni girizmek teklip edilýär. Olar ilkinji nobatda ykdysady hyzmatdaşlyk, ulag geçelgeleriniň ösdürilmegi, kongres-sergi işi hem-de sanlylaşdyrma bilen baglanyşyklydyr.
Şeýle hem 2027-nji ýylda Minsk şäherine (Belarus) we 2028-nji ýylda Karaganda şäherine (Gazagystan) GDA-nyň medeni paýtagty diýen derejesini bermek meselesine seredilmegi meýilleşdirilýär.