Eýran Yslam Respublikasynyň Aşgabatdaky Medeniýet merkezinde ýurduň Prezidenti Seýed Ebrahim Raisiniň, daşary işler ministri Huseýin Amir-Abdollahianyň we olaryň egindeşlerinden ybarat wekilýetiň agzalarynyň 19-njy maýda dikuçar heläkçiliginde aradan çykmagy bilen bagly ýatlama çäresi geçirildi.
Ýatlama gününe Eýran Yslam Respublikasynyň Türkmenistandaky medeniýet meseleleri boýunça geňeşçisi Nawid Rasuli, Eýran Yslam Respublikasynyň Türkmenistandaky ilçisi jenap Ali Mojtaba Ruzbahani, merkeziň pars dilini öwrenijileridir mugallymlary hem-de Eýranyň Türkmenistanda ýaşaýan raýatlary gatnaşdylar.
Çäräniň dowamynda Eýran Yslam Respublikasynyñ Türkmenistandaky ilçisi Ali Mojtaba Ruzbahani hem-de Eýran Yslam Respublikasynyň Türkmenistandaky medeniýet meseleleri boýunça geňeşçisi Nawid Rasuli çykyş etdiler. Olar öz çykyşlarynda Eýranyň Prezidentiniň hemişe halkyna hyzmat edendigini belläp geçdiler.
Şeýle hem Eýranyň diplomatik wekilhanasynyň wekilleri Türkmenistanyň ýolbaşçylaryna agyr pursatda goldaw we medet beriji sözleri üçin hoşallygyny bildirdi.
Çäräniň dowamynda Eýram Yslam Respublikasynyň Medeniýet merkezi tarapyndan Eýran Yslam Respublikasynyň Prezidenti Seýed Ebrahim Raisi, daşary işler ministri Huseýin Amir-Abdollahian we birnäçe egindeşlerinden ybarat wekilýetiň agzalary barada taýýarlanan wideoşekiller görkezildi.