Bütindünýä Saglygy Goraýyş Guramasy Hytaýda işlenip düzülen “CoronaVac” sanjymynyň gyssagly ulanylmagyny tassyklady. Hytaýyň Global teleýaýlym tory BSGG-niň Hytaýyň “Sinowak” kompaniýasynyň koronawirus ýokanjyna garşy işläp düzen “CoronaVac” sanjymyny tassyklandygyny mälim etdi.
Indoneziýada 25 müň 374 saglygy goraýyş edaralarynyň işgärlerine bu sanjymyň 2 dozasy berildi. Şondan soňra 28 günüň dowamynda olar boýunça barlaglar geçirildi we “CoronaVac” sanjymynyň täsirlidigi mälim edildi.
BSSG mundan ozal “Pfizer-BioNTech”, “AstraZeneca”, “Johnson & Johnson”, “Moderna” we “Sinopharm” sanjymlaryny tassyklapdy.
BSGG-niň baş direktory Tedros Adhanom Gebreýesus Hytaýyň sanjymynyň tassyklanmagyndan gaty hoşal bolandygyny belledi. Bu sanjymynyň aňsat saklanylmagy sebäpli elýeterlidigini bellän Gebreýesus, guramanyň şeýlelik bilen 8-nji “COVID-19” sanjymyny gyssagly ulanmagy tassyklandygyny aýtdy.
Bütindünýä Saglygy Goraýyş Guramasy ilkinji gezek 31-nji dekabrda “Pfizer-BioNTech” tarapyndan öndürilen COVID-19 sanjymyny, soňra bolsa “Oksford-AstraZeneca” sanjymyny, “AstraZeneca” sanjym öndürijisiniň Hindistandaky serumu instituty (SII) öndüren sanjymyny, “Astra ZenecaBio” (Günorta Koreýa), “Moderna”, “Janssen” hem-de Hytaýyň “Sinopharm” kompaniýasy tarapyndan öndürilen sanjymlara gyssagly ulanylmagy üçin tassyklapdy.