Türkmenistanyň «Arkadag» toparynyň AFK-nyň Çempionlar ligasy-2 ýaryşynyň 2026/27-nji möwsüminiň toparçalaýyn tapgyryndaky garşydaşlary belli boldy.
Malaýziýanyň Kuala-Lumpur şäherinde geçirilen bije çekişligiň netijesinde «Arkadag» topary B toparçasynda BAE-niň «Al-Jazira», Eýranyň «Gol Gohar» we Bahreýniň «Al-Muharrak» klublary bilen bilelikde çykyş eder.
Türkmen kluby esasy tapgyra saýlama duşuşygynyň üsti bilen çykdy. 12-nji awgustda «Arkadag» topary öz meýdançasynda Hindistanyň «Goa» klubyny 3:0 hasabynda ynamly ýeňip, Çempionlar ligasy-2 ýaryşyna gatnaşmaga hukuk gazandy. Ýeňlişe sezewar bolan «Goa» bolsa AFK-nyň Çagyryş ligasynda çykyş eder.
«Arkadag» üçin bu Çempionlar ligasy-2 ýaryşynda yzly-yzyna ikinji möwsüm bolar. 2025/26-njy möwsüminde topar ýedi utuk toplap, öz toparçasynda ikinji orny eýeledi we 1/8 finala çykdy. Şol tapgyrda «Arkadag» iki duşuşygyň jemi boýunça Saud Arabystanynyň «Al-Nassr» klubyna 0:2 hasabynda ýeňildi.
Şondan bir ýyl öň bolsa «Arkadag» topary AFK-nyň Çagyryş ligasynda ýeňiji bolup, klubuň taryhyndaky ilkinji halkara kubogyny gazandy.
Şu möwsümde Türkmenistan Aziýanyň klub ýaryşlarynda AFK-nyň Çagyryş ligasynda hem wekilçilik eder. Ýurdumyzyň çempionatynyň kümüş medalynyň eýesi «Ahal» AFK-nyň abraýy boýunça üçünji derejeli klub ýaryşy bolan Çagyryş ligasynyň toparçalaýyn tapgyryna göni ýollanma aldy.
Çempionlar ligasy-2 ýaryşynyň toparçalaýyn tapgyrynda her topar alty duşuşyk geçirer. Her toparçanyň iň gowy iki topary 1/8 finala çykar. Ýaryşyň ýeňijisi AFK-nyň elit Çempionlar ligasynyň 2027/28-nji möwsüminiň deslapky tapgyryna gatnaşmaga hukuk gazanar.