Şu gün Türkmenistanyň Prezidenti sanly ulgam arkaly Ministrler Kabinetiniň mejlisini geçirdi. Onda Arkadag şäherini mundan beýläk-de ösdürmäge degişli möhüm resminamalara gol çekildi.
“Watan” habarlar gepleşiginde bellenilip geçilişi ýaly, döwlet Baştutanymyzyň gol çeken resminamasyna laýyklykda, Arkadag şäherinde Çeper halyçylyk kärhanasyny hem-de türkmen halysynyň we el işleriniň milli muzeýini, şeýle hem Arkadag şäherinde degili inžener-kommunikasiýa ulgamlaryny gurmak göz öňünde tutuldy.
Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetine Çeper halyçylyk kärhanasynyň hem-de türkmen halysynyň we el işleriniň milli muzeýiniň taslamasyny düzmek hem-de onuň ýanaşyk ýerlerini abadanlaşdyryp gurmak babatda “Ajaýyp gurluşyk” hususy kärhanasy bilen şertnama baglaşmaga ygtyýar berildi.
Gurluşyk işlerine 2025-nji ýylyň ýanwarynda başlamak we binany 2027-nji ýylyň ýanwar aýynda ulanmaga doly edip tabşyrmak bellenildi.