2026-njy ýylyň 20-nji awgustynda Türkmenistana resmi saparyň çäklerinde Täjigistan Respublikasynyň daşary işler ministri Sirodjiddin Muhriddin bilen Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň arasynda ikiçäk we giňeldilen düzümde gepleşikler geçirildi.
Duşuşyklaryň dowamynda taraplar Täjigistan bilen Türkmenistanyň arasyndaky strategik hyzmatdaşlygy ösdürmegiň hem-de berkitmegiň ýagdaýyny we geljegini maslahatlaşdylar, şeýle hem ikitaraplaýyn gün tertibiniň giň gerimli meseleleri boýunça özara hyzmatdaşlygy has-da ösdürmek ugrunda anyk ädimleri bellediler.
Gepleşikleriň netijeleri boýunça Täjigistan Respublikasynyň we Türkmenistanyň Daşary işler ministrlikleriniň arasynda 2027—2028-nji ýyllar üçin Hyzmatdaşlyk maksatnamasyna gol çekildi.