Türkmenistanda pagta ýygymyna köpçülikleýin girişildi. Bu möhüm oba hojalyk möwsümi ýurdumyzyň ähli sebitlerinde badalga alyp, oba hojalyk pudagynyň we milli ykdysadyýetimiziň ösüşinde uly ähmiýete eýedir.
5-nji sentýabrda Ministrler Kabinetiniň sanly ulgam arkaly geçirilen nobatdaky mejlisinde hormatly Prezidentimiz 10-njy sentýabrda ýurdumyzyň ähli welaýatlarynda pagta ýygymyna girişmäge ak pata berip, pagtaçylara we oba hojalyk zähmetkeşleriniň ählisine işinde uly üstünlikleri arzuw etdi.
AHAL WELAÝATY
Halkara parahatçylyk we ynanyşmak ýylynda «ak altyn» ussatlary gowaça ýetişdirilen 135 müň gektar ýerden şertnamalaýyn meýilnamalaryna laýyklykda, pagtanyň 280 müň tonnasyny almagy maksat edinýärler. «John Deere» kysymly kämil tehnologiýaly kuwwatly pagta ýygyjy kombaýnlaryň 250-ä golaýy daýhanlaryň hyzmatynda bolar. Harmanhanalardyr pagta arassalaýjy kärhanalaryň 30-a golaýy, hasyly kabul ediş nokatlaryna daşajak tehnikalaryň 2 müňden gowragy möwsüme doly derejede taýýarlanyldy.
BALKAN WELAÝATY
Şu ýyl welaýatda 13 müň gektardan 16 müň tonna «ak altyny» Watan harmanyna tabşyrmak göz öňünde tutulýar. Möwsümde pagta ýygyjy kombaýnlaryň 18-si, ýygnalan hasyly daşamak üçin awtoulaglaryň 91-si bökdençsiz işlär.
DAŞOGUZ WELAÝATY
Halkara parahatçylyk we ynanyşmak ýylynda welaýat boýunça 140 müň gektar meýdanda pagtanyň bol hasyly ýetişdirildi. Patrak ýaly açylan pagta meýdanlary göz öňünde tutulan 275 müň tonnalyk sepgide ýetiljekdigine ynam döredýär. Möwsümde «ak altynyň» uly bölegini ýygnap almak üçin pagta ýygýan kombaýnlaryň 200-den gowragynyň güýjünden peýdalanylar.
LEBAP WELAÝATY
Lebaply pagtaçylar 130 müň gektar ýerden «ak altynyň» 320 müň tonnasyny almagy meýilleşdirýärler. Munuň üçin welaýatda ähli mümkinçilikler döredildi. Ýygymda kuwwatly we döwrebap pagta ýygyjy tehnikalaryň 200-e golaýy işlediler.
MARY WELAÝATY
Mary welaýat häkimliginde bolan maslahatda bu möwsümi tiz we guramaçylykly geçirmekde, gowaça ekilen 162 müň gektardan 359 müň tonna «ak altyny» döwlet harmanyna tabşyrmakda her pudagyň, düzümleriň we kärhanalaryň wezipeleri jikme-jik seljerildi. Ýygym möwsümine 250-den gowrak pagta ýygyjy kombaýn taýýar edildi.