Gazagystanyň Prezidenti Kasym-Žomart Tokaýew ABŞ-nyňPrezidenti Donald Trampa Waşingtonyň Gazagystandan getirilýän harytlara 1-nji awgustdan başlap 25% gümrük paçlaryny girizmek barada eden beýannamasy bilen baglanyşykly jogap hatyny iberdi. Gazagystan Prezidentiniň metbugat gullugynyň habar bermegine görä, Tokaýew gepleşiklere taýýardygyny tassyklady hem-de söwda bilen bagly meselede ylalaşyk gazanylmagyna ynam bildirdi.
Tokaýew şeýle hem Astananyň Waşingtony “köp ýyllaryň dowamynda söwda we maýa goýum hyzmatdaşydyr” diýip hasaplaýandygyny we “adalatly, öňünden çak edilip bolýan hem-de iki tarapa peýdaly söwda gatnaşyklarynyň ösdürilmegine ygrarlydygyny” aýtdy.
Şu hepde Tramp “Truth Social” sosial ulgamynda birnäçe döwletiň ýolbaşçylaryna paçlaryň girizilmegi bilen baglanyşykly hatlary paýlaşdy. Bu ýurtlaryň arasynda Gazagystan hem bardy – Tramp Tokaýewe iberen hatynda, 1-nji awgustdan başlap Gazagystandan getirilen ähli harytlara 25% gümrük paçlarynyň giriziljekdigini aýdypdy.
Gazagystanyň Söwda ministrligi gepleşiklere taýardyklaryny, teklip iberendiklerini we ABŞ-nyň bu teklipleri gözden geçirýändigini hem-de gepleşikleriň geçiriljek senesiniň kesgitlenýändigini habar berdi. Şeýle hem, Gazagystanyň jogap çärelerini girizmek baradaky meselä garamaýandygyny aýtdylar.
2024-nji ýylda Gazagystan bilen ABŞ-nyň arasyndaky söwda dolanyşygy $4,2 milliard boldy. 2025-nji ýylyň ýanwar – maý aýlarynda ýurtlaryň arasyndaky söwda dolanyşygy $1,26 milliard bolup, munuň $418,2 milliony eksportdan geldi. “Kazinform” agentligi Gazagystanyň Daşary işler ministrligine salgylanyp, 2015 – 2024-nji ýyllar aralygynda ABŞ-nyň ýurduň ykdysadyýetine $31,1 milliard möçberinde maýa goýan ýurtlaryň onlugyna girendigini hem habar berdi.