Türkiýäniň ykdysady we söwda merkezleriniň biri hasaplanýan Stambul şäherinde Türkmenistanyň eksport harytlarynyň sergisi öz işine başlady. Bu sergi ýurdumyzyň ykdysady ösüşlerini we önümçilik mümkinçiliklerini halkara derejesinde tanyşdyrmagy mümkinçilik berýär.
Açylyş dabarasy Türkmenistan we Türkiýe Respublikasynyň milli senalarynyň ýerine ýetirilmegi bilen başlandy, soň bolsa türkmen öndürijileriniň ägirt uly mümkinçiliklerini açyp görkezýän çykyşlar başlandy. Serginiň ýokary tehnologiýalary, innowasiýa ösüşlerini we öňdebaryjy tejribäni alyşmak üçin täsirli platforma boljakdygy bellendi. Açylyş dabarasyna Türkiýäniň söwda ministri Ömer Bolatyň gatnaşmagy aýratyn ähmiýet berdi. Çykyşynda iki ýurduň arasyndaky söwda we ykdysady gatnaşyklaryň çalt depginde ösýändigini aýtdy.
Ministr Bolat: “Esasy maksadymyz, 5 milliard dollarlyk maksatly söwda mukdaryna gysga wagtda ýetmek” -diýdi. Şu ýylyň ilkinji 6 aýynda Türkmenistan bilen Türkiýäniň arasyndaky söwda dolanyşygynyň takmynan 26,3% ýokarlanyp, 2,2 milliard dollara ýetdi. Ýylyň ahyryna çenli bu görkezijiniň 3 milliard dollardan geçmegine garaşylýar. Iki ýurduň Prezidentleriniň öňde goýan ägirt uly maksadyna ýetmek üçin ikitaraplaýyn söwdada deňagramlylygy saklamak we önümleriň dürlüligini ýokarlandyrmak möhümdir” – diýdi.
Türk ministri energetika pudagyndaky hyzmatdaşlyga hem aýratyn ähmiýet berip, 2024-nji ýylyň 1-nji martynda gol çekilen tebigy gaz pudagynda hyzmatdaşlyk etmek hakyndaky ähtnama laýyklykda, türkmen tebigy gazynyň Türkiýä iberilip başlanandygyny, şeýle hem türkmen gazynyň Türkiýäniň üsti bilen Ýewropa bazaryna çykarmagyň diňe bir ykdysady däl, eýsem döwletleriň arasyndaky strategik hyzmatdaşlyk babatda hem möhümdigini belledi.
Sergi eksport üçin hödürlenýän ýokary hilli önümleriň giň toplumyny hödürleýär. Bu ýere gelýänler senagat we oba hojalyk enjamlaryny we ätiýaçlyk şaýlaryny, gurluşyk materiallaryny, durmuş we elektron enjamlaryny, öý goşlaryny, dokma önümleriniň köp görnüşini we beýleki dürli harytlary we hyzmatlary görüp bilerler.
Türkmenistanyň ykdysadyýetiniň dürli pudaklarynda amala aşyrylan uly göwrümli özgertmeler diňe bir daşary ykdysady gatnaşyklaryň ösmegi üçin däl, eýsem halkara işewürligi üçin täze maýa goýum mümkinçiliklerini açýar.
Sergi Aşgabadyň Türkiýe bilen işewür hyzmatdaşlygy güýçlendirmekdäki aýratyn ähmiýetini aýdyň görkezýär.
Serginiň ilkinji gününde eýýäm söwda we ykdysady gatnaşyklaryň ösüşiniň Türkmenistan bilen Türkiýe Respublikasy bilen hyzmatdaşlykda esasy ileri tutulýan ugurlardan biridigini tassyklaýan köp sanly ikitaraplaýyn duşuşyklar geçirildi.