Türkmenistanyň Buharest şäherindäki Ilçihanasynyň binasynda Türkmenistanyň Rumyniýadaky Ilçisi A.Annaýew bilen Rumyniýanyň öňdebaryjy himiýa kompaniýasy Chimcomplex-iň dolandyryjylar geňeşiniň başlygy Ştefan Wuza bilen resmi duşuşyk geçirildi.
Duşuşygyň dowamynda taraplar senagat we maýa goýum ugurlaryndaky türkmen-rumyn hyzmatdaşlygyny giňeltmegiň mümkinçiliklerini ara alyp maslahatlaşdylar. Rumyn tarapynyň Türkmenistanda bilelikdäki taslamalary durmuşa geçirmek bilen baglanyşykly başlangyçlary we teklipleri beýan edildi.
Söhbetdeşligiň dowamynda öňdebaryjy tehnologiýalaryň alyş-çalyşy, önümçilik hyzmatdaşlygynyň giňeldilmegi we maýa goýumlaryň çekilmegi bilen baglanyşykly meseleler aýratyn bellenildi. Taraplar uzakmöhletleýin hyzmatdaşlyk üçin durnukly esas döretmäge gyzyklanma bildirýändiklerini tassykladylar.
“Chimcomplex” kompaniýasynyň ýolbaşçysynyň Ilçihana eden sapary ikitaraplaýyn hem-de halkara meýdançalarynda ýola goýlan gatnaşyklarynyň logiki dowamyna öwrüldi we Türkmenistan bilen Rumyniýanyň arasynda ykdysady dialogy işjeňleşdirmäge bolan birek-birege ýokary gyzyklanmany görkezdi.