2025-nji ýylyň 13-nji aprelinde Ýaponiýanyň Osaka şäherinde «EKSPO-2025» Bütindünýä sergisiniň açylyş dabarasy bolar. Bu halkara derejeli çärä dünýäniň onlarça ýurdundan wekiliýetler gatnaşýar.
Hormatly Prezidentimiz Serdar Berdimuhamedowyň ýolbaşçylygyndaky ýurdumyzyň wekiliýetiniň Türkmenistanyň Milli gününiň dabaralaryna gatnaşmagy meýilleşdirilýär.
Türkmenistanyň sergisi üçin dörediljek milli platforma ýurduň ykdysady, medeni hem-de innowasion ösüş mümkinçiliklerini giňden açyp görkezmegi maksat edinýär. Platformanyň çäklerinde energetika, ulag-logistika, oba hojalygy, arassa energiýa, sanly ulgam, şeýle hem taryhy-medeni miras bilen bagly maglumatlar ýerleşdiriler.
Türkmenistanyň Milli güni aýratyn baýramçylyk çäreleri bilen bellener. Bu gün milli medeniýetimize degişli çykyşlar, halk döredijiligi bilen tanyşdyryş çäreleri, amaly-haşam önümleriniň sergisi guralyp, gatnaşyjylara milli tagamlar hödürlener.
Türkmenistanyň Söwda-senagat edarasy tarapyndan daşary ýurtly işewür toparlar bilen duşuşyklar, hyzmatdaşlyk boýunça gepleşikler, şeýle hem maýa goýum mümkinçiliklerini tanyşdyrýan forum geçirilmegi göz öňünde tutulýar.
«EKSPO-2025» sergisine gatnaşmak ýurdumyzyň halkara ykdysady gatnaşyklarynyň ösdürilmegine, daşary ýurtly hyzmatdaşlar bilen täze gatnaşyklarynyň ýola goýulmagyna we Türkmenistanyň dünýä giňişligindäki ornunyň has-da berkidilmegine ýardam berer.