Şu gün Türkmenistanyň «Galkan» topary Aşgabatda geçirilýän hokkeý boýunça halkara ýaryşyň çägindäki üçünji duşuşygyny geçirdi. Eýranyň «Ice Box Iran Mall» hokkeý klubunyň garşysyna geçirilen duşuşyk türkmen topary ýene-de bir ynamly ýeňşini, ýagny 13:1 hasabynda ýeňiş gazandy.
Munuň «A» toparçada çykyş edýän türkmen klubunyň üçünji ýeňşidigini ýatladýarys. Çünki birinji duşuşygynda Bahreýn Patyşalygynyň «Bahrain Ice Hockey Club» toparyny 8:1 hasabynda ýeňen ildeşlerimiz ikinji oýnunda Oman Soltanlygynyň «Oman Nationals» klubundan bolsa, 15:1 hasabynda üstün çykdy.
«Galkan» hokkeý kluby halkara ýaryşyň çägindäki nobatdaky duşuşygyny 18-nji aprelde geçirer. Ertir 10:00-da başlanjak duşuşykda türkmen kluby Özbegistan Respublikasynyň «Feniks» toparynyň garşysyna çykar.