Hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwründe giň gerimde amala aşyrylýan durmuş maksatly döwlet syýasatynyň ileri tutulýan ugurlarynyň biri-de milli bilim ulgamyny döwrebaplaşdyrmakdyr. Şunda sagdyn, giň dünýägaraýyşly, hemmetaraplaýyn sazlaşykly ösen, çuňňur bilimli, watansöýüji, zähmetsöýer nesli terbiýeläp ýetişdirmek esasy wezipe hasaplanýar.
Arkadagly Gahryman Serdarymyzyň öňdengörüjilikli başlangyçlary netijesinde röwşen geljegiň eýeleri bolan ýaş nesliň kämil bilim almagyna, döretmegine, zähmet çekmegine, Garaşsyz döwletimize ak ýürekden gulluk etmegine ähli mümkinçilikler döredilýär. Ýaşlar ýurduň guwanjydyr, buýsanjydyr. Şonuň üçinem ýaş nesilleri terbiýelemäge hemişe uly üns berýän halkymyz bu ugurda uly işleri durmuşa geçirýär.
Arkadag Serdarly bagtyýar ýaşlar ýyly olaryň ýiti zehinini, döredijilik başarnygyny, dürli ugurlar boýunça ukybyny ýüze çykarmagyň özboluşly badalgasy boldy.
Türkmenistanda milli bilim ulgamyny kämilleşdirmek, giň gözýetimli, innowasion tehnologiýalary dolandyrmaga ukyply ýaşlary terbiýeläp ýetişdirmek boýunça uly tagallalar edilýär. Ýurdumyzyň obadyr şäherlerinde durmuş ulgamyna degişli desgalar bilen birlikde, döwrebap bilim edaralary hem gurlup ulanmaga berilýär.
Ýurdumyzda «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» we beýleki milli maksatnamalarda bilim ulgamyny kämil derejede ösdürmek, ýokary bilimli hünärmenleri taýýarlamak ugrunda kesgitlenen wezipeler üstünlikli durmuşa geçirilýär.
On iki ýyllyk umumy bilime geçmegiň, sanly bilim ulgamyny ösdürmegiň, daşary ýurt dillerini, tebigy we takyk ylmy ugurlara degişli dersleri okatmagy kämilleşdirmegiň konsepsiýalaryna laýyklykda, bilim ulgamyny döwrebaplaşdyrmak boýunça degişli işler durmuşa geçirilýär. Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda bu ulgamy kämilleşdirmek üçin anyk maksatlar we wezipeler öňde goýulýar hem-de olary amala aşyrmak üçin uly mümkinçilikler döredilýär.
Ýurdumyzda bilim ulgamy üçin döwlet tarapyndan goýberilýän serişdeleriň möçberi ep-esli ýokarlandy we häzirki wagtda täze binalaryň sany hem artdy. Hormatly Prezidentimiziň tagallalary netijesinde berilýän bilimiň hilini dünýä derejesine laýyk ýola goýmakda, şu günki ýaşlara döwrümiziň ösen talaplaryna laýyk bilim we terbiýe bermekde milli ruha ýugrulan, türkmen halkynyň geçmişden şu güne çenli gelip ýeten milli edep-terbiýe mekdebini ýörelge edinmek däbe öwrüldi.
Bilim öwrenmegiň döwrebap mazmuny adamzat ýaşaýşynyň aň-düşünjesini häzirki zamanyň ösen talaplaryna kybapdaş dowam etdirmekdir, onuň geçmiş mirasyny we häzirki wagtdaky gazananlaryny geljekki nesillere ýetirmekdir. Kämil, giň dünýägaraýyşly nesli kemala getirmek bilim ulgamynyň öňünde durýan döwlet derejesindäki baş aladalaryň biridir. Berkarar döwletiň täze eýýamynyň Galkynyşy döwründe durmuşa geçirilýän bilim özgertmeleri bilimli, giň dünýägaraýyşly nesilleri kemala getirmäge ýardam berýär.
Hormatly Prezidentimiz Garaşsyz, hemişelik Bitarap döwletimizde ýaşlaryň ylymly-bilimli bolup ýetişmeklerine giň mümkinçilikleri döredýär. Beýik işleri durmuşa geçirýän we ýurdumyzy ösüşlere besleýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!
Muhabbet Döwletowa,
Aman Kekilow adyndaky Mugallymçylyk mekdebiniň mugallymy.