Türkmen halkynyň Milli Lideri, Türkmenistanyň Halk Maslahatynyň Başlygynyň gatnaşmagynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň Arkadag şäherinde ýerleşýän ştab-kwartirasynda Gaznanyň müdiriýetiniň agzalarynyň hem-de Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň ýolbaşçysynyň, Arkadag şäheriniň häkiminiň gatnaşmaklarynda iş maslahatyny geçirdi.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň geçen döwürde ýerine ýetiren işleri, öňde durýan wezipeler barada çykyş etmek üçin, Gaznanyň wise-Prezidenti R.Bazarowa söz berildi.
Hasabata görä, gaznanyň serişdeleriniň hasabyna ýurt boýunça howandarlyga mätäç çagalaryň hossarlarynyň ýüz tutmagy bilen jemi 260 sany operasiýa geçirildi. Şol sanda, 117 sany ýürek-damar kesellerinde, 102 sany ortopediýa kesellerinde we beýleki birnäçe keseller boýunça barlag bejergileri geçirildi. Mundan başga-da, 47 sany çagalarda saglygy goraýyş-öňüni alyş barlaglary geçirildi. 54 sany çagalar saglygy goraýyş maksatly serişdeler bilen üpjün edildi.
Şol sanda näsag çagalaryň daýanç-hereket ediş ulgamynda operasiýalary ýerine ýetirmek bilen bagly serişdeleri sarp edildi. 1 sany «Sawina» kysymly emeli dem beriş enjamy Mary welaýat çagalar hassahanasyna berildi. Ýurdumyzyň welaýatlaryndaky hassahanalaryň Çagalar bölümlerine «Tiz kömek» awtoulaglary berildi. Haýyr-sahawat gaznasynyň serişdeleriniň hasabyna mekdep-internatlary we çagalar öýleri saglygy goraýyş maksatly serişdeler bilen yzygiderli üpjün edilýär.
Gaznanyň halkara derejesinde hem alyp barýan ynsanperwer işleri doganlyk hem dostlukly ýurtlarda uly goldaw tapýar we Gaznanyň haýyr-sahawat işi baradaky gyzyklanmalary artdyrýar. 2023-nji ýylyň dowamynda Türkiýe, Ukraina döwletleriniň, Russiýa Federasiýasynyň, Owganystanyň, Palestinanyň çagalaryna ynsanperwerlik kömekleriniň iberildi.