2023-nji ýylyň 23-nji oktýabrynda Duşenbe şäherinde Kasri Millat köşgünde Türkmenistanyň täze bellenen Adatdan daşary we Doly ygtyýarly Ilçisi A.B.Goçmyradowyň Täjigistan Respublikasynyň Prezidenti Emomali Rahmona ynanç hatlaryny gowşurmak dabarasy geçirildi. Bu barada Türkmenistanyň Täjigistan Respublikasyndaky ilçihanasy habar berýär.
Ynanç hatlaryny gowşuryp, Ilçi A.B.Goçmyradow Täjigistanyň baştutanyna Türkmenistanyň Prezidenti Serdar Berdimuhamedowyň mähirli salamyny hem-de Türkmenistanyň iki doganlyk ýurduň we halkyň özara gyzyklanmalary doly laýyk gelýän däp bolan döwletara gatnaşyklarynyň mundan beýläk-de ösdürilmegine ygrarlydygyny tassyklaýan iň ýagşy arzuwlaryny ýetirdi.
Dabaranyň barşynda eden çykyşynda Täjigistan Respublikasynyň Prezidenti Emomali Rahmon Türkmenistanyň Täjigistandaky Ilçisini jogapkärli wezipä bellenmegi mynasybetli gutlady hem-de oňa türkmen-täjik köpugurly gatnaşyklarynyň has hem giňeldilmegine we çuňlaşdyrylmagyna gönükdirilen diplomatik işinde üstünlikleri arzuw etdi.
Şeýle hem, Täjigistan Respublikasynyň Prezidenti Türkmenistanyň Prezidentine hem-de Türkmen halkynyň Milli Lideri, Türkmenistanyň Halk Maslahatynyň Başlygyna mähirli salamyny hem-de jan saglygy we abatlyk, ähli türkmen halkyna bolsa gülläp ösüş baradaky iň gowy arzuwlaryny ýetirdi.