“Ilatyň arasynda möwsümleýin ýokanç keselleriň öňüni almak boýunça wagtlaýyn hökmany çäreleri girizmek hakyndaky” Türkmenistanyň Saglygy goraýyş we derman senagaty ministriniň buýruklary ýatyryldy. Bu barada buýruk Türkmenistanyň Adalat ministrliginiň web saýtynda ýerleşdirilipdir.
«Türkmenistanyň Saglygy goraýyş we derman senagaty ministriniň käbir buýruklaryny güýjüni ýitiren diýip ykrar etmek hakynda»Türkmenistanyň Saglygy goraýyş we derman senagaty ministriniň 2023-nji ýylyň 20-nji sentýabrynda çykaran 461 belgili buýrugy bilen COVID-19 boýunça jemgyýetçilik saglygy goraýyş çygrynda dünýädäki adatdan daşary ýagdaý derejesiniň ýatyrylandygy sebäpli öň kabul edilen buýruklar ýatyryldy.
Türkmenistanyň Saglygy goraýyş we derman senagaty ministri,
- Türkmenistanyň Bütindünýä Saglygy goraýyş guramasy tarapyndan COVID-19 boýunça jemgyýetçilik saglygy goraýyş çygrynda dünýädäki adatdan daşary ýagdaý derejesiniň ýatyrylandygyny,
- bu kesele garşy jemgyýetçilik immunitetiniň ýokary derejesiniň emele gelendigini,
- ýiti ýokanç kesellere garşy toplumlaýyn öňüni alyş çärelerini ýerine ýetirmekde toplanan oňyn tejribeleri nazara alyp,
- şeýle hem Türkmenistanyň Keselleriň ýaýramagyna garşy göreşýän adatdan daşary toparynyň 2023-nji ýylyň 1-nji awgustynda geçiren mejlisiniň çözgüdini ýerine ýetirmek maksady bilen aşakdaky buýruklary ýatyrdy :
Ýatyrylan Buýruklar :
1) Türkmenistanyň Adalat ministrliginiň 2020-nji ýylyň 18-nji awgustynda 1371 bellige alyş belgisi bilen döwlet belligine alnan, “Ilatyň arasynda möwsümleýin ýokanç keselleriň öňüni almak boýunça wagtlaýyn hökmany çäreleri girizmek hakyndaky” Türkmenistanyň Saglygy goraýyş we derman senagaty ministriniň 2020-nji ýylyň 17-nji awgustynda çykaran 237 belgili buýrugyny;
2) Türkmenistanyň Adalat ministrliginiň 2022-nji ýylyň 13-nji iýunynda 1613 bellige alyş belgisi bilen döwlet belligine alnan, “Ilatyň arasynda möwsümleýin ýokanç keselleriň öňüni almak boýunça wagtlaýyn hökmany çäreleri girizmek hakyndaky” Türkmenistanyň Saglygy goraýyş we derman senagaty ministriniň 2020-nji ýylyň 17-nji awgustynda çykaran 237 belgili buýrugyna üýtgetme girizmek hakynda” Türkmenistanyň Saglygy goraýyş we derman senagaty ministriniň 2022-nji ýylyň 6-njy iýunynda çykaran 245 belgili buýrugyny.
Bellik : Türkmenistanyň Adalat ministrligi tarapyndan 2023-nji ýylyň 13-nji oktýabrynda 1740 bellige alyş belgisi bilen döwlet belligine alnan.