Duşenbe güni ajaýyp baýramçylyk Halkara zenanlar gününi, ýagny 8-nji mart baýramyny dabaraly belläris. Pursatdan peýdalanyp, eziz enelerimizi, mähriban gelin-gyzlarymyzy bu nurana baýram bilen tüýs ýürekden gutlaýaryn, diýip hormatly Prezidentimiz sanly ulgam arkaly geçirilen Ministrler Kabinetiniň mejlisinde belläp geçdi. Bu barada “Watan” habarlar gepleşiginde aýdylyp geçildi.
Milli Liderimiz bu ajaýyp baýramçylyk mynasybetli 8 we şondan köp çagaly enelerimiziň uly toparyna “Ene mähri” diýen hormatly ady dakmak hakyndaky Permana gol çekdi. Şoňa laýyklykda, hormatly Prezidentimiz käbir köp çagalary enelere ýaşaýyş jaýlaryny bermek hakynda karar gelnendigini belläp, Aşgabat şäherinde “Ene mähri’ diýen hormatly ada we sylaglara mynasyp bolan enelere sowgatlarynyň Jemgyýetçilik guramalarynyň merkezinde gowşurylmagyny Türkmenistanyň Mejlisiniň başlygyna tabşyrdy. Ýaşaýyş jaýlarynyň açaryny bolsa Aşgabat şäheriniň häkimine şäher häkimliginde gowşurmak tabşyryldy.
Welaýatlarda bolsa sylaglary we ýaşaýyş jaýlarynyň açarlaryny welaýat häkimlerine gowşurmak tabşyryldy.