Germaniýanyň “Borussiýa Dortmund” topary Russiýanyň “Zenit” toparynda çykyş edýän eýranly Serdar Azmun bilen gyzyklanýar. Bu barada “Tuttomercatoweb” neşiri habar berýär.
Neşirde bellenilip geçilişi ýaly, häzirki wagtda Germaniýanyň topary bu futbolçyny satyn almak bilen gyzyklanýar. Onuň bahasy 20 million ýewro möýberinde kesgitlenýär.
Mälim bolşy ýaly, Eýranyň milli ýygyndysynyň futbolçysy Serdar Azmun 26 ýaşynda. Ol Russiýanyň “Zenit” toparynda çykyş edip, häzirki möwsümde 20 duşuşykda 11 gezek tapawutlandy.
1995-nji ýylyň 1-nji ýanwarynda dünýä inen Serdar Azmun 9 ýaşyndan bäri futbol oýnaýar. 11 ýaşynda Eýranyň milli ýygyndysynyň düzümine çagyrylýar. 15 ýaşynda Isfahan şäheriniň “Sepahan” toparynda oýnap başlaýar.
Ol daşary ýurtlaryň futbol toparynda çykyş etmäge başlan iň ýaş eýranlyu futbolçydyr. 2012-nji ýylda ol Tatarystanyň “Rubin” toparyna geçýär. Ol ýerde bir ýarym möwsüm oýnady. 2015-nji ýylda “Rostow” toparyna kärendesine berildi. Soňra täzeden türkmenistanly tälimçi Gurban Berdiýew bilen “Rubin” toparyna dolanyp gelýär.
Russiýada çykyş edýän döwründe Serdar Azmun 154 duşuşykda oýnap, 42 gezek tapawutlandy. Şeýle hem ol Eýranyň milli ýygyndysynyň düzüminde 46 duşuşykda 28 pökgi geçirmegi başardy.
Azmunda 2019-njy ýylyň 1-nji fewralynda Russiýanyň çempiony “Zenit” topary bilen şertnama baglaşypdy.
Sungat we medeniýet ulgamyna degişli täzelikler medeniýet sahypamyza ýerleşdirilendir!
