Owganystanyň Demirýol müdirliginiň Hyrat şäheri boýunça bölüminiň wekiliýeti bilen “Türkmendemirýollary” agentliginiň wekiliýetiniň arasynda gepleşikler geçirilip, onda iki ýurduň arasynda Serhetabat-Turgundy demirýol ugry boýunça ýük daşamalaryň möçberini artdyrmak babatda ylalaşdylar. Bu barada owgan tarapynyň “Twitter” jemgyýetçilik torunda habar berilýär.
– Owgan we türkmen tarapy Türkmenistanyň demirýol ulgamy arkaly üstaşyr ýük daşamalary artdyrmak babatda ylalaşdy. Bu babatda Turgundy portunyň mümkinçiliklerini gowulaşdyrmak meýilleşdirilýär – diýlip, bellenilýär.
Häzirki wagtda Owganystanyň import edýän harytlarynyň agramly bölegi Özbegistanyň üsti bilen gelýär. Bu ugurdaky işleri has-da ösdürmek meýilleşdirilýär.
Mälim bolşy ýaly, Serhetabat-Turgundy demirýoly 2019-njy ýylda Türkmenistan tarapyndan döwrebaplaşdyrylyp, onuň geçirijilik mümkinçiligi artdyrylypdy.